पुनर्वास नगर स्तरीय राष्ट्रपति रनिङ शिल्ड१२ पदकसहित जीवन ज्योति मा.वि. शीर्ष स्थानमा, विजय मा.वि. को सर्वाधिक ८ स्वर्ण

पुनर्वास, कञ्चनपुर।कञ्चनपुरको पुनर्वास नगरपालिकामा जारी नगर स्तरीय छैटौँ संस्करणको राष्ट्रपति रनिङ शिल्ड प्रतियोगिता अन्तर्गत पदक तालिकामा श्री जीवन ज्योति माध्यमिक विद्यालय शीर्ष स्थानमा रहेको छ।

प्रतियोगिताको पछिल्लो नतिजाअनुसार जीवन ज्योति मा.वि. ले ५ स्वर्ण, ३ रजत र ४ कास्य गरी कुल १२ पदक जित्दै पदक तालिकाको अग्रस्थान ओगट्न सफल भएको हो। नगरपालिकाभित्रका २६ विद्यालय सहभागी प्रतियोगितामा समग्र पदक संख्याका आधारमा जीवन ज्योति मा.वि. ले वर्चस्व कायम गरेको छ।

यद्यपि, स्वर्ण पदकको संख्याका आधारमा भने श्री विजय माध्यमिक विद्यालय सबैभन्दा अगाडि देखिएको छ। विजय मा.वि. ले ८ स्वर्ण र १ कास्य गरी कुल ९ पदक जितेको छ।

प्रतिस्पर्धा तीव्र, १० विद्यालय अझै पदकविहीन पदक तालिकाअनुसार श्री बागेश्वरी माध्यमिक विद्यालयले स्वर्ण पदक नजिते पनि ६ रजत र २ कास्यसहित कुल ८ पदक हात पार्दै उल्लेखनीय उपस्थिति जनाएको छ।

त्यस्तै, श्री गौरीशंकर मा.वि. र श्री सरस्वती मा.वि. ले समान १ स्वर्ण, २ रजत र २ कास्य पदक जितेका छन्। श्री बाल बागेश्वरी मा.वि. ले २ स्वर्ण पदक प्राप्त गरेको छ भने खप्तड इ.बो. स्कुल र अरेन्ट इ.बो. स्कुलले ४–४ पदक हात पारेका छन्।

अर्कोतर्फ, सिद्धनाथ विद्या निकेतन, सिद्धार्थ पब्लिक स्कुल, भानु मेमोरियल, बालरूपान्तरण, रामबुद्ध माध्यमिक विद्यालय तथा ए.जी. इ.बो. स्कुलसहित १० वटा विद्यालय हालसम्म पदकविहीन रहेका छन्।

खेलकुद विकासको आधार नगरपालिका स्तरीय खेलकुद समितिको आयोजनामा सञ्चालन भइरहेको यस प्रतियोगिताले स्थानीय तहका प्रतिभावान खेलाडीहरूको पहिचान तथा विकासमा महत्वपूर्ण योगदान पुर्‍याउने विश्वास लिइएको छ। विद्यालयका प्रधानाध्यापक तथा नगर खेलकुद पदाधिकारीहरूको उपस्थितिमा दैनिक रूपमा पदक तालिका अद्यावधिक हुँदै आएको छ।आयोजकका अनुसार प्रतियोगिताका केही खेलहरू अझै बाँकी रहेकाले ती खेलहरू भोलि समापन दिनमा सम्पन्न हुनेछन्। प्रतियोगिताको औपचारिक समापन कार्यक्रम भोलि अपराह्न ३ बजे आयोजना हुने जानकारी पनि आयोजकले गराएका छन्।

उद्घाटन कार्यक्रम कञ्चनपुरको दक्षिणी क्षेत्रमा अवस्थित पूर्वाधारयुक्त पुनर्वास नगरपालिकाको छैटौँ राष्ट्रपति रनिङ शिल्ड प्रतियोगिता को उद्घाटन पुनर्वास नगरपालिकाका नगरप्रमुख तोयप्रसाद शर्मा ले प्रमुख अतिथिको आसनबाट गर्नुभएको थियो।

कार्यक्रम नगरपालिका वडा नम्बर ६ का वडा अध्यक्ष तथा जीवन ज्योति माध्यमिक विद्यालय व्यवस्थापन समितिका अध्यक्ष मित्र लामा को अध्यक्षतामा सम्पन्न भएको हो।

१५०० मिटर दौड छात्रतर्फ भएको प्रतिस्पर्धामा श्री जीवन ज्योति माध्यमिक विद्यालय प्रथम स्थान हासिल गर्न सफल भएको छ भने श्री गौरीशंकर माध्यमिक विद्यालय दोस्रो स्थानमा रहँदा श्री जीवन ज्योति माध्यमिक विद्यालय नै तेस्रो स्थानमा रहन सफल भएको छ।

त्यसैगरी १५०० मिटर दौड छात्रातर्फ भएको प्रतिस्पर्धामा पुनर्वास जनता माध्यमिक विद्यालय प्रथम स्थानमा रहँदा श्री जीवन ज्योति माध्यमिक विद्यालय दोस्रो र श्री विजय माध्यमिक विद्यालय तेस्रो स्थानमा रहन सफल भएका छन्।

मार्चपास प्रतियोगितातर्फ दुर्गा माध्यमिक विद्यालय ले प्रथम स्थान हासिल गरेको छ। त्यसैगरी पुनर्वास जनता माध्यमिक विद्यालय दोस्रो स्थानमा रहँदा सरस्वती माध्यमिक विद्यालय र जीवन ज्योति माध्यमिक विद्यालय संयुक्त रूपमा तेस्रो स्थानमा रहेका छन्।

कार्यक्रमका सदस्य सचिव तथा जनज्योति माध्यमिक विद्यालयका प्रधानाध्यापक भरत बस्नेत ले प्रतियोगिताको उद्देश्य, सञ्चालन प्रक्रिया तथा समापन कार्यक्रमबारे जानकारी गराउनुभएको थियो।

लेखकको बारेमा

पत्र नेपाल

थप आर्टिकलहरु :

• कार्तिक ७, २०८३समाचारसूचनाको हकका लागि राष्ट्रिय महासंघका जिल्ला अधिवेशन कार्तिक मसान्तभित्र, प्रदेश अधिवेशन मंसिर १५ सम्म
• अशोज ३०, २०८३Blogवीरबहादुर थापाद्वारा सुदूरपश्चिम प्रदेशसभा सदस्यबाट राजीनामा
• अशोज २९, २०८३शिक्षा
• अशोज २८, २०८३समाचारमहाकालीमा वेपत्ता सशस्त्रका असई सागरको शव फेला