कञ्चनपुर, भदौ १३ ।

नेपाल शिक्षक महासंघको केन्द्रीय निर्देशनअनुसार पुनर्वास नगर समितिले पुनर्वास नगरपालिकाको कार्यालय अगाडि शुक्रबार दुई घण्टा धर्ना बसेर प्रमुख प्रशासकीय अधिकृत तिलक प्रसाद रिजाललाई ध्यानाकर्षण पत्र बुझाएको छ।

नेपाल शिक्षक महासंघ पुनर्वास नगर समितिका अध्यक्ष जय बहादुर मडै र सह–सचिव नवराज ओझाले हस्ताक्षर गरेको ध्यानाकर्षण पत्रमा विगतका आन्दोलन र सहमतिहरूको पालना नगरेको भन्दै तीव्र असन्तोष प्रकट गरिएको छ। महासंघले २०७५, २०७८ र २०८० सालका आन्दोलनमार्फत ३० बुँदे, ५१ बुँदे र ६ बुँदे सहमति नेपाल सरकारसँग गरेको भए पनि कार्यान्वयन नगरेको उल्लेख गरिएको छ।

२०७८ सालमा ८९ दिन लामो आन्दोलन र २०८१ चैत्रमा २९ दिनसम्म काठमाडौंमा केन्द्रीय शैक्षिक सडक आन्दोलन सञ्चालन भएपछि २०८२ वैशाख १७ गते नेपाल सरकार र महासंघबीच सहमति भएको थियो। सो सहमतिअनुसार मन्त्रिपरिषद्ले ९ बुँदे निर्णय गरेको र प्रमुख राजनीतिक दलका सचेतकहरूले असार १५ भित्र विद्यालय शिक्षा विधेयक पारित गर्ने लिखित प्रतिबद्धता जनाए पनि अहिलेसम्म कार्यान्वयन नभएको भन्दै शिक्षकहरूले आक्रोश व्यक्त गरेका छन्।

ध्यानाकर्षण पत्रमा अस्थायी शिक्षकको स्थायीत्वका लागि आन्तरिक परीक्षामा सहमतिअनुसार ७५% कोटा नदिनु, गोल्डेन हेन्डसेक रकम स्पष्ट नगरिनु, स्थायी शिक्षकको आवधिक बढुवा व्यवस्था नसमेटिनु, विद्यालय कर्मचारी र बालकक्षा शिक्षकको पद तथा सेवा–सुविधा सुनिश्चित नगरिनु, शिक्षकको अनुमतिपत्र नथपिनु, विभागीय कारबाही सहमतिअनुसार नहुनु, अन्यायपूर्ण सरुवाको व्यवस्था ल्याइनु, संस्थागत विद्यालय शिक्षकको सेवा–सुरक्षा नसमेटिनु, राष्ट्रिय परीक्षा बोर्डमा महासंघको प्रतिनिधित्व नदिनु लगायतका मुद्दा सम्बोधन नभएको उल्लेख छ।

महासंघले विद्यालय, विद्यार्थी र शिक्षक–कर्मचारीमैत्री विधेयक बनाउन तत्काल पहल गर्न सरकारसँग जोडदार माग गरेको छ। प्रतिनिधि सभामा दर्ता भएको विधेयक संशोधनमार्फत सहमतिहरूलाई कार्यान्वयन गर्न सकिने अवस्था अझै रहेको भन्दै संघले ध्यानाकर्षण गराएको छ।

पुनर्वास नगर समितिले हालको कार्यक्रम प्रचारात्मक आन्दोलन मात्र भएको र माग सम्बोधन नभए दोस्रो चरणमा अझ कडा आन्दोलन सुरु हुने चेतावनी दिएको छ। आन्दोलनका कारण सिर्जना हुने परिस्थिति प्रति सरकार नै जिम्मेवार हुने चेतावनीसमेत महासंघले दिएको छ।

लेखकको बारेमा

पत्र नेपाल

थप आर्टिकलहरु :

• साउन १२, २०८३समाचारभजनीमा नेरुडे मिर्मिरे लघुवित्तद्वारा मृतक सदस्य परिवारलाई क्रियाखर्च सहयोग
• साउन १, २०८३शिक्षास्कुल भ्यानको ठक्करबाट मोटरसाइकल चालक घाइते, निजी विद्यालयका सवारी व्यवस्थापनमाथि प्रश्न
• असार २७, २०८३कलापुनर्वास नगरपालिकामा न्यायमा पहुँच अभिवृद्धि परियोजनाअन्तर्गत नागरिक सहायता कक्ष सुदृढीकरण तथा कानुनी सचेतना कार्यक्रम सम्पन्न
• असार ८, २०८३खेलकुदवडा सदस्य लागुऔषधसहित पक्राउ