कञ्चनपुर — कञ्चनपुरको पुनर्वास नगरपालिकामा सशस्त्र प्रहरीले निःशुल्क स्वास्थ्य शिविर सञ्चालन गरेको छ। सशस्त्र प्रहरी बल नेपाल नं. ७ वैद्यनाथ बाहिनी मुख्यालय कैलालीको २५औँ स्थापना दिवसको अवसर पारेर आयोजना गरिएको उक्त स्वास्थ्य शिविरबाट स्थानीय नागरिकहरू प्रत्यक्ष लाभान्वित भएका छन्।

पुनर्वास नगरपालिका–९ स्थित वडा कार्यालय परिसरमा सञ्चालन गरिएको शिविरको उद्घाटन गर्दै नगर प्रमुख तोय प्रसाद शर्मा ले दुर्गम तथा अस्पतालको पहुँचभन्दा टाढा रहेका नागरिकका लागि यस्ता शिविर अत्यन्तै प्रभावकारी हुने उल्लेख गर्नुभयो। उहाँले सशस्त्र प्रहरी बलले आफ्नो पालिकालाई प्राथमिकतामा राखेर स्वास्थ्य सेवा उपलब्ध गराएकोमा धन्यवाद व्यक्त गर्दै आगामी दिनमा पनि यस्ता जनहितका कार्यक्रमलाई निरन्तरता दिन आग्रह गर्नुभयो।

कार्यक्रममा बोल्दै नं. ७ वैद्यनाथ बाहिनीका निमित्त बाहिनिपति दिग बिजय सुबेदी ले स्थापना दिवसको अवसरमा जनताको स्वास्थ्य सेवामा प्रत्यक्ष योगदान दिन पाउँदा गर्व महसुस भएको बताउनुभयो। उहाँले सशस्त्र प्रहरी केवल सीमा सुरक्षामा मात्र सीमित नरही शान्ति सुरक्षा, विपद् व्यवस्थापन तथा चोरी–तस्करी नियन्त्रणसँगै सामाजिक उत्तरदायित्व वहन गर्दै आएको स्पष्ट पार्नुभयो। “सीमामा बस्ने नागरिक स्वस्थ रहँदा मात्र राष्ट्रको सीमा सुदृढ रहन्छ,” उहाँले भन्नुभयो, “यसै उद्देश्यका साथ सीमा नजिकका बस्तीहरूमा स्वास्थ्य शिविर सञ्चालन गरिएको हो।”

वडा नं. ९ का वडाध्यक्ष नर बहादुर बिक का अनुसार स्थानीय बासिन्दालाई लक्षित गरी सञ्चालन गरिएको शिविरमा आँखा, स्त्रीरोग, दन्त तथा अन्य सामान्य रोग सम्बन्धी परीक्षण र उपचार सेवा प्रदान गरिएको थियो। शिविरबाट आँखासम्बन्धी समस्याका ४८५, स्त्रीरोगका ७२, दन्त रोगका १३२ तथा अन्य रोगका ८० जना गरी कुल ७६९ जना सेवाग्राही लाभान्वित भएका छन्।

शिविर सञ्चालनमा पुनर्वास नगरपालिका, वडा नं. ९ को कार्यालय, सशस्त्र प्रहरी बल नेपाल नं. ३५ गण शैलेश्वरी तथा सीमा सुरक्षा गुल्म बेलौरीको सहकार्य रहेको थियो।

स्वास्थ्य सेवा लिन आएका स्थानीयवासीहरूले ग्रामीण क्षेत्रमा यस्तो प्रकारको निःशुल्क सेवा अत्यन्त उपयोगी र प्रभावकारी भएको प्रतिक्रिया दिएका छन्। उनीहरूले आगामी दिनमा पनि सुरक्षाकर्मी, जनप्रतिनिधि तथा सम्बन्धित निकायहरूले जनमैत्री भावनासहित यस्ता कार्यक्रमलाई निरन्तरता दिनुपर्नेमा जोड दिएका छन्।

सामाजिक उत्तरदायित्व र जनसेवाको भावनासहित सुरक्षाकर्मी, प्रशासन, जनप्रतिनिधि तथा समाजसेवीहरूबीच समन्वय र सहकार्य सुदृढ हुँदै जाँदा मात्रै जनताको हक–हित सुनिश्चित हुने सरोकारवालाहरूको भनाइ छ। नागरिकको सेवामा समर्पित भई इमान्दारीपूर्वक कार्य गर्ने संस्कार विकास हुनु आजको आवश्यकता भएको सहभागीहरूले औँल्याएका छन्।

लेखकको बारेमा

पत्र नेपाल

थप आर्टिकलहरु :

• चैत्र २९, २०८२कलाहेभेन पर्ल बर्ड एकेडेमीको १६औँ वार्षिक उत्सव तथा नतिजा प्रकाशन कार्यक्रम सम्पन्न
• चैत्र २३, २०८२शिक्षासमाजसेवी शिव बिष्टद्वारा बुवा–आमाको सम्मानमा पुनर्वास का १४ विद्यालयमा अक्षयकोष स्थापना
• चैत्र २२, २०८२शिक्षाशिक्षक बिमल चन्द मृत अवस्थामा फेला, घटनाबारे अनुसन्धान जारी
• चैत्र २०, २०८२कलालालझाडीमा ७ दिने योग शिक्षक प्रशिक्षण कार्यक्रम सम्पन्न