लालझाडीमा ७ दिने योग शिक्षक प्रशिक्षण कार्यक्रम सम्पन्न

कञ्चनपुर — लालझाडी गाउँपालिकाको आयोजनामा सञ्चालन गरिएको ७ दिने योग शिक्षक प्रशिक्षण तथा योग शिविर शुक्रबार एक कार्यक्रमका बीच सम्पन्न भएको छ। गाउँपालिकाको वडा नम्बर २कन्ज स्थित अर्चना बाबाको भवनमा सञ्चालन भएको उक्त कार्यक्रम पतञ्जलि योग समिति नेपाल र पतञ्जलि युवा समिति नेपालको सहकार्य तथा नेपाल सरकारसँगको साझेदारीमा आयोजना गरिएको थियो।

समापन कार्यक्रममा गाउँपालिकाका अध्यक्ष निर्मल राना प्रमुख अतिथिका रूपमा उपस्थित हुनुहुन्थ्यो भने प्रमुख प्रशासकीय अधिकृत राजबहादुर सार्की विशिष्ट अतिथि रहनुभएको थियो। त्यसैगरी योगाश्रीका प्रमुख तथा कार्यक्रमका मुख्य प्रशिक्षक लवदेव मिश्रले सम्पूर्ण प्रशिक्षणको नेतृत्व गर्नुभएको थियो।

सात दिनसम्म सञ्चालन भएको उक्त शिविरमा जनप्रतिनिधि, वडा अध्यक्षहरू, स्वास्थ्यकर्मी, विद्यालय शिक्षक, खेलप्रेमी, बुद्धिजीवी तथा स्थानीय नागरिकहरूको सक्रिय सहभागिता रहेको थियो। कार्यक्रममार्फत सहभागीहरूलाई योग अभ्यास, स्वस्थ जीवनशैली र रोग प्रतिरोधात्मक क्षमता वृद्धि सम्बन्धी ज्ञान प्रदान गरिएको थियो।

कार्यक्रमका मुख्य प्रशिक्षक मिश्रले वर्तमान समयमा अस्वस्थकर खानपान र जीवनशैलीका कारण विभिन्न स्वास्थ्य समस्या बढ्दै गएकाले योग अभ्यास अत्यन्त आवश्यक भएको बताउनुभयो। उहाँका अनुसार योगले शरीरलाई निरोगी, तन्दुरुस्त र मानसिक रूपमा सशक्त बनाउन महत्वपूर्ण भूमिका खेल्दछ।

त्यसैगरी प्रमुख प्रशासकीय अधिकृत सार्कीले नियमित योग अभ्यासले मानिसलाई स्वस्थ, अनुशासित र सक्रिय जीवनयापन गर्न सहयोग पुग्ने बताउनुभयो। उहाँले योगले रोगसँग लड्ने क्षमता वृद्धि गर्नुका साथै कार्यक्षमतामा समेत सुधार ल्याउने धारणा व्यक्त गर्नुभयो।

समापन कार्यक्रममा गाउँपालिका अध्यक्ष रानाले यस्ता स्वास्थ्य प्रवर्द्धनका कार्यक्रम आगामी दिनमा पनि निरन्तर सञ्चालन गरिने प्रतिबद्धता व्यक्त गर्नुभयो। उहाँले योगले व्यक्तिको आत्मविश्वास, मानसिक शान्ति र समग्र स्वास्थ्य सुधारमा महत्वपूर्ण योगदान पुर्‍याउने उल्लेख गर्दै कार्यक्रम सफल बनाउन सहयोग गर्ने सम्पूर्ण सहभागी तथा आयोजकलाई धन्यवाद ज्ञापन गर्नुभयो।

उक्त कार्यक्रमले लालझाडी क्षेत्रका नागरिकहरूमा स्वास्थ्य सचेतना अभिवृद्धि गर्नुका साथै निरोगी जीवनशैलीतर्फ प्रेरित गर्ने विश्वास लिइएको छ।

लेखकको बारेमा

पत्र नेपाल

थप आर्टिकलहरु :

• भदौ २०, २०८३समाचारभन्सार छलीका सामान बरामदमा सुदूरपश्चिम प्रदेश प्रहरीको सक्रियता बढ्यो
• भदौ ६, २०८३राजनितिकम्युनिस्ट नेतृत्वकै सरकारमा दलित प्रतिनिधित्व शून्य : समावेशितामाथि गम्भीर प्रश्न
• साउन २३, २०८३समाचारनिर्मला हत्याकाण्डमा तत्तकालिन आईजिपि सर्वोन्द खनालमाथि अनुसन्धान हुनुपर्छ पत्रकार भण्डारी 
• साउन २३, २०८३समाचारनेपाल–भारत आवतजावत गर्ने यात्रुका लागि ठूलो झट्का, गौरीफन्टा नाकामा आधार कार्डबाट प्रवेश बन्द