लाल बहादुर एस के/ पुस ४, कञ्चनपुर जिल्ला कारागार कञ्चनपुरमा कैदीबन्दीहरूबीच झडप हुँदा आठ जना कैदी घाइते भएका छन्। शुक्रबार अपराह्न करिब ५ बजेतिर कारागारभित्र रहेका कैदीबन्दीहरूबीच आपसी झडप भएको हो।

कैदीबन्दीहरूको भनाइ अनुसार कारागार प्रशासनको कमजोरी, नाइकेहरूको मनपरी र आन्तरिक व्यवस्थापनमा देखिएको समस्याका कारण झडपको अवस्था सिर्जना भएको हो। घटनापछि कारागारभित्र तनावग्रस्त अवस्था बनेको छ भने सुरक्षाका लागि नेपाल प्रहरी र सशस्त्र प्रहरीको बाक्लो उपस्थिति तैनाथ गरिएको कञ्चनपुरका प्रहरी प्रवक्ता डिएसपी सागर बोहराले जानकारी दिनुभयो।

कैदीबन्दीहरूले कारागारका नाइके, चौकिदार तथा प्रशासनबाटै अनावश्यक रूपमा रकम असुली हुने गरेको आरोप लगाएका छन्। उनीहरूका अनुसार आफूहरूले पाउने मासिक सुविधा रकमसमेत पूरा नदिने, क्यान्टिनका सामग्रीमा कमिसन खाने, कारागारभित्र मदिरा तथा लागुऔषध सहजै प्रवेश गर्ने गरेको जस्ता गम्भीर आरोपहरू लगाइएका छन्।

उक्त आरोपबारे कारागारकी जेलर बन्दना सुवेदीले अस्वीकार गर्दै भन्नुभयो, “त्यस्तो कुनै गतिविधि भएको छैन। कैदीबन्दीहरूले चौकिदार र नाइके परिवर्तन गर्नुपर्ने माग गरेका छन्। म नयाँ हुँ, कारागारमा आएको करिब १५ दिन मात्र भएको छ। सबै कुरा सिक्दैछु, बुझ्दैछु। सुरक्षासम्बन्धी विषयमा सम्बन्धित सुरक्षाकर्मीलाई थाहा होला।”

झडपमा परेर ३४ वर्षीय किरण सिंह, ४७ वर्षीय करण कुवँर, ३० वर्षीय दिनेश कुवँर, ४० वर्षीय राजेन्द्र सुनार, रोशन शाही, २९ वर्षीय मदन गिरी, २७ वर्षीय सन्दीप भण्डारी र २९ वर्षीय जनक खड्का घाइते भएका छन्।

जसमध्ये चार जनाको टाउकोमा र अन्य चार जनाको छाती तथा हातमा सामान्य चोट लागेको जेलर सुवेदीले बताउनुभयो। घाइते सबैको महाकाली प्रादेशिक अस्पतालमा उपचार भइरहेको छ।

हाल कञ्चनपुर कारागारमा ३८५ जना कैदीबन्दी रहेका छन्। कारागारभित्र यति ठूलो झडप हुनुले सुरक्षाप्रति गम्भीर प्रश्न उठाएको स्थानीयवासीको भनाइ छ।

आम नागरिकहरू भन्छन्—“कारागारजस्तो उच्च सुरक्षाको क्षेत्रमा नै यस्तो घटना हुन्छ भने बाहिर सर्वसाधारणको सुरक्षा अवस्था कस्तो होला?” यस्ता घटनाले देशको समग्र सुरक्षा अवस्था कमजोर बन्दै गएको संकेत गरेको भन्दै नागरिकहरूले सरकार र सुरक्षा निकायप्रति चिन्ता व्यक्त गरेका छन्।

नागरिकहरूका अनुसार यस्तै अवस्था रहिरहे सरकारको अस्तित्वप्रति नै प्रश्न उठ्ने अवस्था आउने भन्दै राज्यले जनधनको सुरक्षा सुनिश्चित गर्न गम्भीर कदम चाल्नुपर्ने आवश्यकता औंल्याएका छन्।

लेखकको बारेमा

पत्र नेपाल

थप आर्टिकलहरु :

• कार्तिक ७, २०८३समाचारसूचनाको हकका लागि राष्ट्रिय महासंघका जिल्ला अधिवेशन कार्तिक मसान्तभित्र, प्रदेश अधिवेशन मंसिर १५ सम्म
• अशोज ३०, २०८३Blogवीरबहादुर थापाद्वारा सुदूरपश्चिम प्रदेशसभा सदस्यबाट राजीनामा
• अशोज २९, २०८३शिक्षा
• अशोज २८, २०८३समाचारमहाकालीमा वेपत्ता सशस्त्रका असई सागरको शव फेला