लोकतान्त्रिक मार्ग बजेटबाट बाहिरिँदा पुनर्वासमा निराशा, पुनर्वास जनताले जनाए असन्तुष्टि

पुनर्वास, कञ्चनपुर। कञ्चनपुरको पुनर्वास–१० दोदा पुलदेखि पुनर्वास–५ कम्पनीडाँडासम्म जोड्ने बहुप्रतीक्षित लोकतान्त्रिक मार्ग आगामी आर्थिक वर्ष २०८३/८४ को सुदूरपश्चिम प्रदेश सरकारको बजेटमा समावेश नभएपछि पुनर्वासवासी निराश बनेका छन्। चालु आर्थिक वर्षमा सुरु भएको सडक निर्माणले पूर्णता नपाउने चिन्ता स्थानीयवासीले व्यक्त गरेका छन्।

हाल उक्त सडकमा दोदा पुलदेखि ८३४ मिटरसम्म आरसीसी ढलान सम्पन्न भएको छ भने त्यसपछि ५६० मिटर खण्ड निर्माणाधीन अवस्थामा छ। त्यसपछिको बाँकी सडक भने अझै धुलाम्मे र हिलाम्मे अवस्थामै रहेको छ।

चालु आर्थिक वर्ष २०८२/८३ मा पुनर्वास नगरपालिका, प्रदेश पूर्वाधार विकास कार्यालय र संघीय सहरी विकास मन्त्रालयको संयुक्त लगानीमा करिब ८ करोड रुपैयाँको बजेटबाट सडक निर्माण भइरहेको छ। तर आगामी आर्थिक वर्षका लागि प्रदेश सरकारले थप बजेट विनियोजन नगरेपछि योजना अधुरै रहने सम्भावना बढेको छ।

सुदूरपश्चिम प्रदेश सरकारका भूमि व्यवस्था, कृषि तथा सहकारी मन्त्री वीरबहादुर थापाले लोकतान्त्रिक मार्गका लागि आफ्नो मन्त्रालयबाट ५ करोड रुपैयाँ पहिलो प्राथमिकतामा राखी मुख्यमन्त्री कार्यालय र अर्थ मन्त्रालयमा सिफारिस गरिएको जानकारी दिए। उनका अनुसार उक्त रकम पुनर्वास–५, ६, ७, ८ र ९ जोड्ने सडकको कालोपत्रे तथा स्तरोन्नतिका लागि प्रस्ताव गरिएको थियो।

मन्त्री थापाले भने, “लोकतान्त्रिक मार्ग पुनर्वास क्षेत्रका हजारौं नागरिकको प्रत्यक्ष सरोकारसँग जोडिएको योजना भएकाले पहिलो प्राथमिकतामा राखेर बजेट सिफारिस गरेको थिएँ। तर अन्तिम बजेटमा समावेश नगरिनु दुःखद हो। जनताको आवश्यकता र दीर्घकालीन विकासलाई ध्यानमा राखेर अघि बढ्नुपर्ने योजनाले प्राथमिकता नपाउनु निराशाजनक विषय हो।”

उनले बजेट निर्माण प्रक्रियामा सबै मन्त्रालयका सिफारिस र प्राथमिकतालाई समान रूपमा सम्बोधन नगरिएको अनुभूति भएको उल्लेख गर्दै आगामी दिनमा यस योजनालाई पुनः प्राथमिकतामा राख्न पहल गर्ने बताए।

यता पुनर्वास नगरपालिकाका नगरप्रमुख तोय प्रसाद शर्माले लोकतान्त्रिक मार्गलाई नगरपालिकाको पहिलो प्राथमिकताको योजनाका रूपमा प्रदेश सरकारसमक्ष पटक–पटक प्रस्ताव र डेलिगेसनमार्फत उठाइएको बताए। बजेटमा योजना समावेश हुने आश्वासन प्राप्त भए पनि अन्तिम समयमा छुटेपछि स्थानीयवासी निराश बनेको नगरप्रमुखको सचिवालयले जनाएको छ।

स्थानीयवासीले गत वर्षदेखि सुरु भएको सडक निर्माणलाई निरन्तरता दिई आवश्यक बजेटको व्यवस्था गर्न प्रदेश सरकारसँग माग गरेका छन्। उनीहरूका अनुसार लोकतान्त्रिक मार्ग सम्पन्न भए पुनर्वासका नागरिकलाई सदरमुकाम तथा प्रदेशसँगको आवागमन सहज हुनुका साथै स्थानीय आर्थिक गतिविधिमा समेत उल्लेखनीय टेवा पुग्नेछ।

लेखकको बारेमा

पत्र नेपाल

थप आर्टिकलहरु :

• भदौ ६, २०८३राजनितिकम्युनिस्ट नेतृत्वकै सरकारमा दलित प्रतिनिधित्व शून्य : समावेशितामाथि गम्भीर प्रश्न
• साउन २३, २०८३समाचारनिर्मला हत्याकाण्डमा तत्तकालिन आईजिपि सर्वोन्द खनालमाथि अनुसन्धान हुनुपर्छ पत्रकार भण्डारी 
• साउन २३, २०८३समाचारनेपाल–भारत आवतजावत गर्ने यात्रुका लागि ठूलो झट्का, गौरीफन्टा नाकामा आधार कार्डबाट प्रवेश बन्द
• साउन १२, २०८३समाचारभजनीमा नेरुडे मिर्मिरे लघुवित्तद्वारा मृतक सदस्य परिवारलाई क्रियाखर्च सहयोग