कञ्चनपुरः कञ्चनपुरको पुनर्वास नगरपालिकालाई स्थानीय आपतकालीन कार्य सञ्चालन केन्द्र (एलईओसी) सुदृढीकरणका लागि सामग्री हस्तान्तरण गरिएको छ। नेपाल राष्ट्रिय समाज कल्याण संघ (एनएनएसडब्ल्यूए) र मर्सिकोर नेपालको साँझेदारी तथा द कोकाकोला फाउण्डेशनको आर्थिक सहयोगमा सञ्चालित नेपालमा पूर्वानुमानमा आधारित पूर्वकार्यको सुदृढीकरण (सान) परियोजनाअन्तर्गत सो सामग्री हस्तान्तरण गरिएको हो।

हालै देशव्यापी रूपमा भएको जेन्जी आन्दोलनका क्रममा पुनर्वास नगरपालिकामा पनि आगजनी र तोडफोडका घटना भएका थिए, जसका कारण नगरपालिकाबाट नियमित सेवा प्रवाहमा कठिनाई भएको थियो। आवश्यक सामग्री अभावका कारण नगरपालिकाले विपद् व्यवस्थापनसम्बन्धी गतिविधिहरू प्रभावकारी रूपमा सञ्चालन गर्न नसकेको अवस्थामा, नगरपालिकाको माग अनुसार सान परियोजनाले स्थानीय आपतकालीन कार्य सञ्चालन केन्द्र सुदृढीकरणका लागि आवश्यक सामग्रीहरू हस्तान्तरण गरेको हो।

नेपाल राष्ट्रिय समाज कल्याण संघ (एनएनएसडब्ल्यूए) का कार्यकारी निर्देशक अशोक बिक्रम जैरूले नगरपालिकाले यस्तो जटिल परिस्थितिमा पनि आफ्ना स्रोत साधनमार्फत सेवा प्रवाह गरिरहेको भन्दै प्रशंसा गर्नुभयो। उहाँका अनुसार आन्दोलनका कारण पुनर्वास नगरपालिकाका धेरै सामग्रीहरू, विशेषगरी स्थानीय आपतकालीन कार्य सञ्चालन केन्द्रमा रहेका उपकरणहरू पूर्ण रूपमा नष्ट भएका थिए। उहाँले विपद् व्यवस्थापनका लागि स्थानीय आपतकालीन कार्य सञ्चालन केन्द्र सञ्चालनमा रहन जरुरी रहेको उल्लेख गर्दै, सो सञ्चालन कार्य सहज बनाउनका लागि पालिकाको माग अनुसार आवश्यक सामग्रीहरू हस्तान्तरण गरिएको जानकारी दिनुभयो।

पुनर्वास नगरपालिकाका नगर प्रमुख तोय प्रसाद शर्माले जेन्जी आन्दोलनका क्रममा नगरपालिकामा पनि आगजनी र तोडफोडका घटनापछि सेवा प्रवाह गर्न निकै कठिनाइ भएको बताउनुभयो। उहाँले यस कठिन परिस्थितिमा संस्थाले गरेको सहयोगको सराहना गर्दै, हस्तान्तरण गरिएको सामग्रीले नगरपालिकाको सेवा प्रवाह र विपद् व्यवस्थापन कार्यमा थप टेवा पुग्ने विश्वास व्यक्त गर्नुभयो।

त्यस्तै, पुनर्वास नगरपालिकाका विपद् सम्पर्क व्यक्ति ओमनाथ ढकालले आगजनी र तोडफोडपछि स्थानीय आपतकालीन कार्य सञ्चालन केन्द्रले सामग्री अभावका कारण सेवा प्रवाह गर्न नसकेको बताउनुभयो। उहाँले अहिले सान परियोजनामार्फत सामग्री प्राप्त भएपछि अब विपद् व्यवस्थापनसँग सम्बन्धित आपतकालीन कार्य सञ्चालन गर्न सहजता हुने बताउनुभयो।

सान परियोजनाका कार्यक्रम संयोजक देवराज बडुले स्थानीय आपतकालिन कार्य सञ्चालन केन्द्र सुदृढीकरणका लागि पुनर्वास नगरपालिकालाई एक थान डेल कम्प्युटर, डिजिटल डिस्प्ले बोर्ड, प्रिन्टर, राउटर, कार्यालय टेबल, एक्सटर्नल हार्ड डिष्क, कार्यालय कुर्ची, प्लाष्टिक कुर्चिहरु, नोटिस बोर्ड, स्टील कपबोर्ड, अफिस प्याकेट, भिजिबिलिटी बोर्ड र स्मार्ट बोर्ड सहित झन्डै रु. ७ लाख ३० हजार बराबरको सामग्री हस्तान्तरण गरिएको जानकारी दिनुभयो

यस सामग्री हस्तान्तरणसँगै पुनर्वास नगरपालिकामा आपतकालिन तयारी र विपद् व्यवस्थापन कार्य अझ सुदृढ हुने विश्वास गरिएको छ।

लेखकको बारेमा

पत्र नेपाल

थप आर्टिकलहरु :

• चैत्र २९, २०८२कलाहेभेन पर्ल बर्ड एकेडेमीको १६औँ वार्षिक उत्सव तथा नतिजा प्रकाशन कार्यक्रम सम्पन्न
• चैत्र २३, २०८२शिक्षासमाजसेवी शिव बिष्टद्वारा बुवा–आमाको सम्मानमा पुनर्वास का १४ विद्यालयमा अक्षयकोष स्थापना
• चैत्र २२, २०८२शिक्षाशिक्षक बिमल चन्द मृत अवस्थामा फेला, घटनाबारे अनुसन्धान जारी
• चैत्र २०, २०८२कलालालझाडीमा ७ दिने योग शिक्षक प्रशिक्षण कार्यक्रम सम्पन्न