एनआरएनए नर्वे शर्माद्वारा पुनर्वासको बागीश्वरी माध्यमिक विद्यालयका १९२ विद्यार्थीलाई ट्र्याकसुट र टिसर्ट वितरण

कञ्चनपुर, पुनर्वास ।

पुनर्वास नगरपालिका–८, पृथ्वीबस्तीस्थित बागीश्वरी माध्यमिक विद्यालय को ५४औँ वार्षिक उत्सव तथा अभिभावक दिवस शुक्रबार विद्यालय प्राङ्गणमा भव्य रूपमा सम्पन्न भएको छ। कार्यक्रममा विद्यालय परिवार, अभिभावक, जनप्रतिनिधि, समाजसेवी, बुद्धिजीवी, पत्रकार तथा विद्यार्थीहरूको उल्लेखनीय सहभागिता रहेको थियो।

उक्त अवसरमा गैरआवासीय नेपाली संघ (एनआरएनए) अन्तर्गत NRNA Norway को सहयोगमा विद्यालयमा अध्ययनरत बालकक्षादेखि कक्षा ७ सम्मका १९२ जना विद्यार्थीहरूका लागि ट्र्याकसुट तथा टिसर्ट खरिदार्थ आर्थिक सहयोग प्रदान गरिएको छ। सहयोग हस्तान्तरण कार्यक्रममा विद्यालय व्यवस्थापन समिति अध्यक्ष राना श्रवण, कार्यक्रमका प्रमुख अतिथि पुनर्वास नगर प्रमुख तोय प्रसाद शर्मा, भरत बिष्ट, लोकबहादुर कार्की, कृष्णबहादुर तामाङ तथा पुनर्वास उपशाखा रेडक्रस सोसाइटीका सभापतिलगायतको उपस्थिति रहेको थियो।

विद्यालयका पूर्वविद्यार्थी तथा हाल नर्वेमा बसोबास गर्दै आउनुभएका प्रदीप शर्मा को नेतृत्वमा विभिन्न दाताहरूले विद्यार्थीहरूलाई न्यानो लुगा वितरण गर्न आर्थिक सहयोग प्रदान गरेका हुन्। बालकक्षादेखि आधारभूत तहसम्म सोही विद्यालयमा अध्ययन गरेका शर्मा बाल्यकालदेखि नै असल, ज्ञानी, इमान्दार तथा सहयोगी स्वभावका विद्यार्थीका रूपमा परिचित हुनुहुन्थ्यो। विद्यालय जीवनमै अध्ययनसँगै सांस्कृतिक कार्यक्रम, खेलकुद तथा सामाजिक गतिविधिमा सक्रिय सहभागिता जनाउँदै आउनुभएका उहाँ गुरुजनप्रति आदरभाव र समाजप्रतिको जिम्मेवारीबोधका कारण गाउँ समाजमा समेत सबैका प्रिय व्यक्तित्वका रूपमा चिनिनुहुन्थ्यो।

उच्च अध्ययन तथा रोजगारीको सिलसिलामा विदेशिनुभएका शर्मा हाल नर्वेमा रहे पनि आफ्नो जन्मभूमि, विद्यालय र गाउँ समाजप्रति उत्तिकै समर्पित देखिनुहुन्छ। हालै विद्यालयका विद्यार्थीहरूलाई न्यानो लुगा उपलब्ध गराउने कार्यमा मुख्य पहल तथा समन्वयकारी भूमिका निर्वाह गर्दै उहाँले पुनः आफ्नो मानवीय तथा समाजसेवी भावना उजागर गर्नुभएको छ।

सहयोग गर्ने दाताहरूमा प्रदीप शर्मा रु. १,००,०००, देव श्रेष्ठ रु. ४७,०००, शारदा सिंह थापा रु. ३७,५००, रिता परिवार रु. ३२,०००, रुपेश श्रेष्ठ रु. २२,५००, असिम लम्साल रु. २२,५०० तथा सागर घिसिङ रु. १८,००० रहेका छन्।

न्यानो लुगा प्राप्त गरेपछि विद्यार्थी भाइबहिनीहरू तथा अभिभावकहरू अत्यन्त उत्साहित र खुसी भएका छन्। चिसो मौसममा पठनपाठनका लागि सहज वातावरण सिर्जना गरिदिएको भन्दै सबैले सहयोगी दाताहरूप्रति हृदयदेखि नै कृतज्ञता व्यक्त गरेका छन्। यस सहयोगले विद्यार्थीहरूको मनोबल उच्च बनाउनुका साथै अध्ययनप्रति थप प्रेरणा मिलेको विद्यालयले जनाएको छ।

यसैबीच विद्यालयका प्रधानाध्यापक डिल्लीप्रसाद शर्मालगायत शिक्षक–शिक्षिकाहरूले विद्यालयको शैक्षिक वातावरण थप सहज र व्यवस्थित बनाउन अक्षयकोषमा रकम जम्मा गर्ने कार्यलाई निरन्तरता दिँदै आएका छन्।

वार्षिक उत्सव तथा अभिभावक दिवस कार्यक्रम विद्यालयको समग्र शैक्षिक उन्नयन, अभिभावक–विद्यालय सम्बन्ध सुदृढीकरण तथा विद्यार्थीहरूको उत्साहवर्द्धन गर्ने उद्देश्यका साथ सफलतापूर्वक सम्पन्न भएको विद्यालय प्रशासनले जनाएको छ।

लेखकको बारेमा

पत्र नेपाल

थप आर्टिकलहरु :

• साउन १२, २०८३समाचारभजनीमा नेरुडे मिर्मिरे लघुवित्तद्वारा मृतक सदस्य परिवारलाई क्रियाखर्च सहयोग
• साउन १, २०८३शिक्षास्कुल भ्यानको ठक्करबाट मोटरसाइकल चालक घाइते, निजी विद्यालयका सवारी व्यवस्थापनमाथि प्रश्न
• असार २७, २०८३कलापुनर्वास नगरपालिकामा न्यायमा पहुँच अभिवृद्धि परियोजनाअन्तर्गत नागरिक सहायता कक्ष सुदृढीकरण तथा कानुनी सचेतना कार्यक्रम सम्पन्न
• असार ८, २०८३खेलकुदवडा सदस्य लागुऔषधसहित पक्राउ