पुनर्वास कञ्चनपुर — अनिवार्य तथा निःशुल्क शिक्षा सम्बन्धी कार्ययोजना प्रभावकारी रूपमा कार्यान्वयन गर्ने उद्देश्यले पुनर्वास नगरपालिकामा एकदिने अभिमुखीकरण कार्यक्रम सम्पन्न भएको छ। पुनर्वास नगरपालिका शिक्षा, युवा तथा खेलकुद शाखाद्वारा आयोजित उक्त कार्यक्रममा नगरभित्रका सामुदायिक विद्यालयका प्रधानाध्यापक, विद्यालय व्यवस्थापन समिति अध्यक्ष तथा १ देखि ११ वडाका वडाध्यक्षहरूको उल्लेखनीय सहभागिता रहेको थियो।

कार्यक्रमका सभापति पुनर्वास नगरपालिका वडा नम्बर ३ का वडाध्यक्ष कृष्ण बहादुर तामाङ रहनुभएको थियो भने प्रमुख अतिथिको रूपमा नगर प्रमुख तोय प्रसाद शर्माको उपस्थिति रहेको थियो।

कार्यक्रममा पुनर्वास नगरपालिकाका शिक्षा, युवा तथा खेलकुद शाखा प्रमुख शिवराज भट्टले अनिवार्य तथा निःशुल्क शिक्षासम्बन्धी नीतिहरू, कार्ययोजना तथा कार्यान्वयन प्रक्रियाबारे विस्तृत जानकारी दिनुका साथै सहभागीहरूलाई प्रशिक्षण प्रदान गर्नुभएको थियो।

शाखा प्रमुख भट्टले ४ वर्षदेखि १३ वर्ष उमेर समूहका सबै बालबालिकालाई अनिवार्य रूपमा विद्यालयमा भर्ना गरी नियमित पठनपाठनमा सहभागी गराउनुपर्नेमा जोड दिनुभयो। उहाँका अनुसार नयाँ शैक्षिक सत्र सुरु हुनुअघि नै यस्ता अभिमुखीकरण कार्यक्रम सञ्चालन गरी सबै सरोकारवालालाई सचेत गराउनु आवश्यक रहेको बताइएको छ।

कार्यक्रमका प्रमुख अतिथि नगर प्रमुख तोय प्रसाद शर्माले अंग्रेजी भाषा मात्र शिक्षा होइन भन्ने कुरा स्पष्ट पार्दै निजी क्षेत्रका विद्यालयहरूको आफ्नै भूमिका भए पनि सामुदायिक विद्यालयले पनि छुट्टै पहिचान बनाउँदै गुणस्तरीय शिक्षा प्रदान गर्दै आएको बताउनुभयो। उहाँले सामुदायिक विद्यालयको सुदृढीकरणमार्फत सबै बालबालिकालाई समान अवसरसहित गुणस्तरीय शिक्षा दिनुपर्नेमा जोड दिनुभयो।

कार्यक्रममा सहभागी वक्ताहरूले अनिवार्य शिक्षालाई सफल बनाउन अभिभावक, विद्यालय र स्थानीय तहबीच सहकार्य अपरिहार्य रहेको उल्लेख गरेका थिए। साथै, विद्यालय बाहिर रहेका बालबालिकालाई पहिचान गरी विद्यालयमा ल्याउने अभियानलाई अझ सशक्त बनाउने प्रतिबद्धता व्यक्त गरिएको थियो।

कार्यक्रमको सञ्चालन पुनर्वास नगरपालिकाका कर्मचारी तथा विपद् व्यवस्थापन शाखाका फोकल पर्सन (सम्पर्क व्यक्ति) ओमनाथ ढकालले गर्नुभएको थियो।

पुनर्वास नगरपालिकाले शिक्षा क्षेत्रमा सुधार ल्याउन तथा सबै बालबालिकालाई शिक्षाको पहुँचमा ल्याउने लक्ष्यसहित यस्ता कार्यक्रमलाई निरन्तरता दिने जनाएको छ।

लेखकको बारेमा

पत्र नेपाल

थप आर्टिकलहरु :

• भदौ २०, २०८३समाचारभन्सार छलीका सामान बरामदमा सुदूरपश्चिम प्रदेश प्रहरीको सक्रियता बढ्यो
• भदौ ६, २०८३राजनितिकम्युनिस्ट नेतृत्वकै सरकारमा दलित प्रतिनिधित्व शून्य : समावेशितामाथि गम्भीर प्रश्न
• साउन २३, २०८३समाचारनिर्मला हत्याकाण्डमा तत्तकालिन आईजिपि सर्वोन्द खनालमाथि अनुसन्धान हुनुपर्छ पत्रकार भण्डारी 
• साउन २३, २०८३समाचारनेपाल–भारत आवतजावत गर्ने यात्रुका लागि ठूलो झट्का, गौरीफन्टा नाकामा आधार कार्डबाट प्रवेश बन्द