प्रतियोगिताको २४ औं संस्करणमा पुलिसले ३ खेलमा विपक्षीलाई हराउने क्रममा ४ गोल गरेको छ । ब्ल्याक बुल्सले भने २ खेलमै ७ गोल पुर्‍याएको छ । पुलिसले उद्घाटन खेलमा आयोजक सहारालाई १–०, क्वाटरफाइनलमा ब्रिगेड ब्वाइज यूकेलाई २–० र सेमिफाइनलमा

‘ए’ डिभिजन लिग विजेता चर्च ब्वाइज युनाइटेडलाई १–० ले हराएको थियो । सिधैं क्वाटरफाइनल खेलेको ब्ल्याक बुल्सले भारतको थन्डरबोल्ट नर्थ युनाइटेड सिक्किमलाई ३–० र पाँचपल्टको च्याम्पियन थ्रीस्टारलाई ४–० ले पराजित गरेको थियो । दुवै टोलीबीचको समानता भनेको विपक्षीबाट कत्ति पनि गोल नखानु हो ।

यसपल्ट पुलिस क्लबसँग चिरपरिचित खेलाडी छैनन् । बरू युवा जोसले भरिएका नयाँ खेलाडी छन् । पुलिसको बलियो पक्ष भनेकै टिम ‘स्पिरिट’ र यसको गति हो । लिग विजेता चर्चा ब्वाइजलाई प्रतियोगिताकै २ सय ५० औं खेलमा हराउँदा पुलिसका खेलाडीमा हौसला बढेको छ । यो सिजनमा यसअघि सभापति कप, भरत गोल्डकप र बुढासुब्बा गोल्डकपमा पहिलो खेलबाटै बाहिरिनुपरेको पुलिस आहा–रारामा कीर्तिमानी ११ औंपल्ट फाइनल पुग्दा हौसिएको छ । ब्ल्याक बुल्सको खेल हेरिसकेपछि पुलिसका खेलाडी सशंकित छन् । उपाधि यात्रामा ब्ल्याक बुल्स बाधक बन्ने डर पुलिसमा प्रस्ट देखिन् ।

प्रशिक्षक चेतन घिमिरे ब्ल्याक बुल्स शारीरिक र प्राविधिक रूपमा राम्रो टिम रहे पनि फाइनलमा जुध्न आफूहरू मानसिक तयार भएको बताउँछन् । शुक्रबार प्रि म्याच कन्फेरेन्समा उनले पछिल्लो ९ महिना पुलिसले एकसाथ प्रशिक्षण गरेको फाइदा पुलिसलाई रहेको बताए । ‘खेलको अवस्था हेरेर कस्तो रणनीति अपनाउने भन्नेमा हामी सफल छौं, स्कोर पनि गर्न पुगिरहेका छौं,’ उनले भने, ‘अब पनि त्यहीअनुसार रणनीति प्रयोग गर्छौं ।’ उनले आफ्ना खेलाडीमा विश्वास रहेको र रणनीतिअनुसार तयारी गरेर जित्ने लक्ष्य रहेको बताए । भने, ‘इतिहास बनाउने सुनौलो अवसर छ ।’

टिम कप्तान राम वाजी पुलिसको स्टार खेलाडीले भरिएको पहिले र युवा खेलाडीले भरिएको अहिलेको टिममा धेरै फरक रहेको स्वीकारे । ‘अहिले हामीलाई गाह्रो नै छ । हामीलाई च्यालेन्ज पनि छ, नयाँ प्लेयरहरू छ, योङ प्लेयर छ, त्यो केटाहरूलाई ग्रुम गर्नुपर्‍यो । मोटिभेट गर्नुपर्‍यो,’ उनले भने, ‘हरेक कुरामा च्यालेन्ज छ तर यो च्यालेन्ज स्वीकारेर नै हामी अगाडि बढिरहेका छौं ।’

इतिहास बनाउले सबैको चाहना हुने भन्दै उनले पुलिसका खेलाडीको गति, युवा जोस र टिमको रणनीतिले पनि धेरै काम गरिरहेको बताउँछन् । ‘हाम्रो एउटै रणनीति हुँदैन । परिवर्तन भइरहन्छ । प्रशिक्षकले दिएको निर्देशन पछ्याइरहेका छौं । त्यही कुराले रिजल्ट आइरहेको छ,’ उनले भने, ‘यही कुरालाई निरन्तरता दिएर फाइनल आफ्नो पक्षमा पार्ने विचार छ ।’

यू–२३ टोलीबाट खेल्न काठमाडौं पुगेका आशिष राई र सुजन मगरले सेमिफाइनल खेल्न पाएनन् । मिडफिल्डमा कप्तान वाजीसँग सहकार्य गरेका राईको अभाव पनि टिममा देखिने छ । उनीहरूको अभावलाई अन्य खेलाडीले पूर्ति गर्नेमा कप्तान वाजी विश्वस्त छन् ।

एएफसी च्याम्पियन्स लिग खेलेको उज्वेकिस्तानको फुटबल क्लब नाभबाहोर नामानगान एफसीको दोस्रो रोजाइका खेलाडी सम्मिलित टिम हो, ब्ल्याक बुल् । यो टिममा नाभबाहेरबाटै खेलेका अलिजोन अलिजोनोभ पनि सामेल छन् । राष्ट्रिय टोलीबाट खेलेका अन्य तीन खेलाडी समावेश छन् ।

नेपाल आएर जावलाखेल युथ क्लबबाट ‘ए’ डिभिजन लिग खेलेका अब्दुलाजिज निसोनबाएभ यसपल्ट ब्ल्याक बुल्समा प्रशिक्षक भएर आएका छन् । मनाङ मर्स्याङ्दीबाट खेलेका साइदजमोल यसपल्ट पोखरा खेल्न आएका छन् । मनाङबाटै खेलेका रन्दीप पौडेल टिममा समेटिएका छन् । वैकल्पिक गोलरक्षक सुदीप सुनार र हङकङका सान्जियो लिम्बू यो टिममा छन् ।

यसपल्ट ब्ल्याक बुल्सले फाइनलमा पुलिसलाई अप्ठेरोमा पार्ने दर्शकको आँकलन छ । ब्ल्याक बुल्सले फाइनल जिते प्रतियोगिताले नयाँ च्याम्पियन पाउने छ । यसअघि पुलिसले ०५८, ०५९, ०६४, ०६५, ०६६ र ०७४ मा उपाधि जितेको थियो । मनाङ मर्स्याङ्दीले ६ पल्ट, थ्रीस्टारले पाँचपल्ट, संकटाले दुई, सहारा, अफ्रिकन युनाइटेड, एपीएफ र आर्मीले एक–एक पटक उपाधि उचालेका छन् ।

यसपल्ट प्रतियोगितामा तीन विदेशी टोली सहभागी भए पनि ब्ल्याक बुल्स भाग्यमानी ठहरियो । उपाधि जित्ने पहिलो विदेशी टोली अफ्रिकन युनाइटेड थियो । टोलीले ०६२ मा उपाधि जितेको थियो । प्रतियोगितामा यसपल्ट ब्ल्याक बुल्स दाबेदार देखिँदा संकटा, थ्रीस्टार, मछिन्द्र जस्ता टिम कमजोर साबित भए । प्रतियोगितामा १२ टिम प्रतिस्पर्धी थिए ।

ब्ल्याक बुल्सका प्रशिक्षक अब्दुलाजिज निशोनबाएभ फाइनल खेलमा सधैं ५०–५० कै सम्भावना हुने बताउँछन् । पुलिसका खेलाडी द्रूत गतिमा खेलिरहेको बताउँदै उनले रणनीति पनि राम्रो रहेको बताए । ‘पोखरा सुन्दर छ,’ उनले भने, ‘मौका पायौं भने अर्कोपल्ट पनि खेल्न आउँछौं ।’

कप्तान जाखोनगिर आख्मादोभले जित्ने गरी तयारी गरेको सुनाए । प्रतियोगितामा विजेताले १२ लाख १ हजार र उपविजेताले ६ लाख १ हजार रुपैयाँ पुरस्कार पाउनेछन् ।