कञ्चनपुर, भदौ १२ – पुनर्वास नगरपालिका–अशुबर्माबस्ती १ का ६२ वर्षीय चन्द्रदत्त गौतमको विद्युत करेन्ट लागेर मृत्यु भएको छ। बेलौरीस्थित विद्युत वितरण केन्द्र अन्तर्गतको लाइन पुनर्वास क्षेत्रमा सामान्य हुरीहवाका क्रममा विद्युतको सर्भिस तार चुँडिएर बाटोमा खसेको अवस्थामा गौतमलाई करेन्ट लागेको स्थानीय बासिन्दाहरूले जानकारी दिएका छन्।

खसेको तारमा करेन्ट प्रवाह भइरहेका बेला बाटो प्रयोग गर्दै गरेका गौतमलाई करेन्ट लाग्दा घटनास्थलमै मृत्यु भएको बताइएको छ। यसअघि पनि स्थानीयहरूले पटक–पटक विद्युत कार्यालयलाई तार चुँडिएको र सम्भावित दुर्घटनाबारे जानकारी गराए पनि बेवास्ता गरिएको गुनासो गरेका छन्। विद्युत आपूर्ति निकायले समयमै सचेत कदम नचालेको कारण यसरी मानवीय क्षति बेहोर्नु परेको भन्दै स्थानीयवासी आक्रोशित बनेका छन्।

घटनापछि स्थानीय बासिन्दा, जनप्रतिनिधि तथा त्रिभुवनबस्ती इलाका प्रहरी कार्यालयको टोली घटनास्थलमा पुगेको थियो। प्रारम्भिक अनुसन्धान सुरु गरिएको इलाका प्रहरी कार्यालय त्रिभुवनबस्तीका प्रमुख महेशविक्रम शाहीले जानकारी दिनुभयो। उहाँका अनुसार मृतकको शवलाई पोस्टमार्टमका लागि बेलौरी श्रीपुर स्वास्थ्य संस्थामा पठाइएको छ।

स्थानीयवासीले विद्युत सर्भिस तार व्यवस्थापनमा देखिने निरन्तर लापरवाहीप्रति गम्भीर आपत्ति जनाएका छन्। उनका अनुसार यसअघि पनि तार खस्ने, चुहावट हुने र दुर्घटनाका घटनाहरू पटक–पटक भए तापनि सम्बन्धित निकायले आवश्यक पहल नगर्दा ठूलो मानवीय क्षति हुने अवस्था सिर्जना भइरहेको छ। जनप्रतिनिधिहरूले समेत पटकपटक सचेत गराउँदा पनि विद्युत कार्यालयले ढिला सुस्ती गर्ने र समयमा काम नगर्ने प्रवृत्तिका कारण जनताले ज्यानको मूल्य चुकाउनु परेको भन्दै आक्रोश पोखेका छन्।

यसैबीच, पुनर्वास क्षेत्रका स्थानीय बासिन्दाहरूले विद्युत प्राधिकरणको लापरवाही तत्काल रोक्नुपर्ने, तार तथा पोलहरूको समयमै मर्मतसम्भार गर्नुपर्ने र मानवीय क्षति हुने खतरापूर्ण स्थानहरूमा तत्काल ध्यान दिनुपर्ने माग गरेका छन्। घटनापछि बस्तीभर त्रास फैलिएको छ भने मृतक गौतमको परिवार शोकाकुल बनेको छ।

लेखकको बारेमा

पत्र नेपाल

थप आर्टिकलहरु :

• कार्तिक ७, २०८३समाचारसूचनाको हकका लागि राष्ट्रिय महासंघका जिल्ला अधिवेशन कार्तिक मसान्तभित्र, प्रदेश अधिवेशन मंसिर १५ सम्म
• अशोज ३०, २०८३Blogवीरबहादुर थापाद्वारा सुदूरपश्चिम प्रदेशसभा सदस्यबाट राजीनामा
• अशोज २९, २०८३शिक्षा
• अशोज २८, २०८३समाचारमहाकालीमा वेपत्ता सशस्त्रका असई सागरको शव फेला